1Sa 11 | NdeIBE | STEP | UNahashi um-Amoni wasuka wayivimbezela iJabheshi Gileyadi. Bonke abantu baseJabheshi bathi kuye, “Yenza isivumelwano lathi, thina sizakuba ngaphansi kwakho.”

1 Samuel 11

USawuli uhlenga idolobho laseJabheshi

1 UNahashi um-Amoni wasuka wayivimbezela iJabheshi Gileyadi. Bonke abantu baseJabheshi bathi kuye, “Yenza isivumelwano lathi, thina sizakuba ngaphansi kwakho.”

2 Kodwa uNahashi um-Amoni waphendula wathi, “Ngizakwenza isivumelwano lani kuphela nxa kuyikuthi ngizakhupha ilihlo lesandla sokunene emuntwini wonke wakini ukuze u-Israyeli wonke ngimlethele ihlazo.”

3 Abadala baseJabheshi bathi kuye, “Sinike izinsuku eziyisikhombisa ukuze sithume izithunywa kulo lonke elako-Israyeli; nxa engekho ozasihlenga sizazinikela kuwe.”

4 Kwathi izithunywa sezifike eGibheya kaSawuli njalo zabika izimiso lezi ebantwini bonke bakhala kakhulu. 5 Ngasonalesosikhathi uSawuli wayevela emasimini, engemuva kwezinkabi zakhe, wasebuza esithi, “Kuyini okonakeleyo ebantwini? Kungani bekhala?” Bamlandisela okwakutshiwo ngabantu baseJabheshi.

6 Kwathi uSawuli esezwe amazwi abo, uMoya kaNkulunkulu wehlela phezu kwakhe ngamandla, wathukuthela kakhulu. 7 Wathatha izinkabi ezimbili, waziquma zaba yiziqayiqa, wathumela iziqa lezithunywa kulo lonke elako-Israyeli, zimemezela zisithi, “Lokhu yikho okuzakwenziwa ezinkabini zikabani lobani ongalandeli uSawuli loSamuyeli.” Ukwesabeka kukaJehova kwehlela ebantwini, baphuma sebenjengomuntu munye. 8 Kwathi uSawuli esebaqoqile eBhezeki, abantu bako-Israyeli babeyizinkulungwane ezintathu abakoJuda beyizinkulungwane ezingamatshumi amathathu.

9 Batshela izithunywa ezazifikile bathi, “Tshelani abantu baseJabheshi Gileyadi ukuthi, ‘Kuzakuthi ilanga selitshisa kusasa, lina lizakuba selihlengiwe.” ’ Kwathi izithunywa sezihambe zayabika lokhu ebantwini baseJabheshi, bathokoza. 10 Basebesithi kuma-Amoni, “Kusasa sizazinikela kini, njalo lingenza kithi loba kuyini okukhanya kukuhle kini.”

11 Ngelanga elalandelayo uSawuli wehlukanisa abantu bakhe baba ngamaviyo amathathu; kwathi ngomlindo wokucina ebusuku bafohlela ezihonqweni zama-Amoni bawabulala ilanga laze latshisa. Lawo aphephayo ahlakazeka, akwaze kwaba lamabili awo asala endawonye.

USawuli uyemukelwa njengenkosi

12 Abantu basebesithi kuSamuyeli, “Ngubani owabuza wathi, ‘USawuli uzasibusa na?’ Balethe kithi labobantu sibabulale.”

13 Kodwa uSawuli wathi, “Kakho ozabulawa lamhla, ngoba ngalolusuku uJehova umhlengile u-Israyeli.”

14 USamuyeli wasesithi ebantwini, “Wozani, kasiyeni eGiligali siyeqinisa ubukhosi khona.”

15 Ngakho abantu bonke baya eGiligali bamqinisa uSawuli ukuba yinkosi phambi kukaJehova, njalo uSawuli labantu bonke bako-Israyeli baba lomkhosi omkhulu wokuthokoza.